15．各路人
老尼夸奖独头毛笔字好，上海首创新魏体，风行全国，伊就讲得清爽：间架照魏碑，因为用排笔刷大标语，所以笔法特别点，字形内圆外方，是因为排笔额转折。伊就因为改练新魏体，勒造反派迭搭蛮吃香。——后来到了乡下头，独头荒废了书法，只靠捏锄头挣工分了。乡下识字额弗多，毋啥必要写字，碰着结婚要写红双喜，知青中随挑一个去写，农民分弗出好坏。
我有个远房小叔，有怪癖，大家嫌贬伊。料弗到就凭书法好，伊做了造反派的军师，大家又去托事体。独头小小相似，红卫兵战斗队叫伊刷大标语，然后送伊几只像章。扫四旧，独有书法辰旧吃香额。我还晓得一桩大事体：造反派书法新秀，合力请出朱季海，当场观摩伊写十六个大楷字。
从中央文革到地方造反派，无不热衷书法，风气呀。上海象谢稚柳、来楚生，侪打倒过，名头也还不够。朱季海呢，章太炎关门弟子，各头大，辈份高；五十年代起谢绝聘书，弗肯改造思想呀。正因为弗在职，毋没本单位造反派去揪斗，蒙混过关了。文化界，辰旧买伊账，上海出版古籍碰到疑难，可以凭出版局面子，去苏州请教朱先生。
沓趟由出版系统造反派，奉送一大包清宫笔、墨，请伊出山一趟。晓得是抄家得来，老先生照样笑纳，随时宜谓中庸哎。先生穷得要死，吃救济金；将一堆笔墨卖拨识货额，六块洋钿，是桩大生意。每礼拜吃一碗鸡鸭血汤补身体，算下来够开销一年多。
吃血汤，倒退到茹毛饮血，朱老戏称。实在伊是有过教训，要保命，预防浮肿病复发。困难时期，曾有友人赠杏仁糖霜，救了伊浮肿，先生诗谢：“人间有甘露，昨夜结为霜。之子亲携赠，高情世敢当。玄亭休载酒，衰疾正须糖。解擘仙林杏，何劳写禁方。”诗篇貌似冠冕，又暗含讥讽，比如“禁方”，就影射彭氏万言书犯禁。唉，象伊沓种顽固反动，早该做右派送甘肃劳改，去从干屎里，抠出未消化的黄豆蚕豆，细嚼慢咽补身体……。
老尼朝我看，眼睛里打个问号：朱先生沓桩机密事体，伊只听到过点毛毛雨，我哪能嘎清爽。我只是含糊过去。多少年后头，才有机会告诉伊，抗战初期，太炎先生勒苏州发起“老子军”，我祖父就是“有钱出钱”的角色；由此结缘章门，我爷跟章门弟子也一向交好……。也是好多年以后，小表哥告诉我，朱季海，其实是内定的“控制人员”；伊抗拒改造，摆明是敌对，但又要利用伊哎。毛主席发表啥最新，碰弗碰用个典故，夹忙头里，只有问伊，才知出处、正解，所以“内控利用”。
——世道变了，过了五十年，知青侪退休了，养老金够用，发财也弗眼热，侬吃得落多少、睏几只床？还求啥，鸿鹄高志，承道统，求文明。季海先生高寿，跨世纪而学界硕果之仅存，大家纷纷誉其当年“沉默是金”：山高水长，委屈求全，以期传道解惑。也不过一时的兴头话，先生始终等弗到放胆直言之日，几部遗稿，还侪是古籍校注。
孔子讲：“朝问道，夕死可也。”“道”在多方，文化载道，艺术载道。就等民族文化火种复燃，仁义重立，中国人才心安理得。老知青树老根多，受教了，觉悟了，也不妨文艺宏道。阿拉三个，当年西去列车上额难兄难弟，倒真额又聚一堆，吃茶，读《芥子园》，学海派，商量商量，弄点啥。老尼搔头皮，伊已经专攻漫画，但是画啥呢？伊胆小，怕惹上妄议啥，复归无语，辰旧泥菩萨了。这都后话。
——送晚饭了，老尼跟手推餐车后头，又偷渡回去。号称是“最后的晚餐”，明朝中上可以到昆明。火车慢腾腾开过贵阳站，是隔天清清早。啊唷，真额喏，贵州穷呀，火车站嗄简陋！“天无三日晴，地无三尺平，人无三钱银”；一点弗错，阴雨天呀，看出去是雾蒙蒙额山连山，火车站破落呀，几乎像上海郊区长途汽车站。四个伟大的标语，雨朦中还大看见；但站上人对知青专列，都没激动，没感动，三忠于都白做的，忒落后。云南人又会哪能嘎？
车窗外，景观变化，车厢内，今朝跟昨日、前日，辰旧差弗多；好象神仙洞里，可以弗管世外；几个睏醒过来额两排扣，还勒算老账。伊拉觉得，一对大翻领，去广播间唱了趟样板戏，占多了秋色：“工宣队应该让侬去朗诵首诗额呀，俩个犯错误额，反倒出风头喏！”“弗是额，侬想么，假使大家侪讲是逃脱捉回来，就变成工宣队拆烂污，事体毋没做好，所以……”。这一歇，听到女声朗诵，咬字归声，象煞电台播音，是长诗《在西去列车的窗口》：激情澎湃，思绪高远，是支疆年代的名篇，声誉高过《我们新疆好地方》。不过一笑“稍息”了，是沓几个女生又逗乐玩，其中有个擅长播音的。
浪漫与现实毕竟弗相干，知青去新疆，生活反差忒大，住地窟，苦熬难度日；军垦连队劳动当打仗，轻伤弗下火线；又要侬向舍命保庄稼额抗灾英雄看齐，心里起恐惧。三年转正后探亲，囡抱牢娘哭噢；上海人大都冷静了，“覅想得忒好”！侬看，就算探亲额好事体，来回奔波，还费一个号头（月），还吃足苦头！
啊，俗气！沓点闲话，伊位覅听额。党的女儿的女儿，特殊材料制成，“到农村去到边疆去”，歌声一起，恨不得插翅飞去的。“可以大有作为”，一句顶一万句，还去听那些。
实际上，沓桩事体佬有讲究，不过讲起来佬反动。听朱先生随便讲讲：古辰光么，屯垦边荒多有，官府张榜，征招失地流民，许以垦荒地权，资以粮、种。贫民成家立业有望，甘愿苦做；十年树人，边民安生，交税服兵役，公私两利。再比如元末战乱、灾荒，人烟稀绝，明太祖“湖广填四川”，就是迁湖南湖北人口去四川；还有山西人口迁河南河北，淮南人口迁淮北，都就近乡土，莫违常情……。
——沓几个觉悟超前额排头女兵，驳斥邪说的；坐位号一二三四，就坐厕所间斜对面，厕所门一开，扑面恶酸臭，伊拉屏牢，弗肯叫出来；正宗额，小辰光就学过掏粪模范时传祥，怕臭是资产阶级哎！一路来，伊拉表现都正宗。
大皮交鲜格格，还没进厕所门，就掿出香烟来。“小流氓！”伊拉疾恶如仇，就告诉了工宣队；戴正了军帽，一本正经去报告。后来又看到大昌伊拉，想来也是进去吃香烟，不过沓几个又有点像工人造反派，有派头额，算唻，放过。实在是沓种人狠来兮额，顶好覅惹。
伊拉真理在手，又一向定夺同学中是非，向老师报告，有辰光是纵恿别人去报告，沓能就邪气（非常）有小领导派头，自觉百分百是体制中人。——再过五十年，侬看呀，伊拉辰旧是中国大妈额领队。
（200-15·待续）
最新评论