14．嘎三胡
火车咣当一震，又慢腾腾开动；好像停岔道上多少年，生锈了，铁器磨得吱吱响。听有人抱怨，那吃光大葱额军装兄，于是发出高论：讲弗定是等毛主席专列过去呢，覅忒光荣噢。
上海知青去向：黑、吉、内蒙、徽、赣、黔、滇；前日专列横贯江西，沿线“广阔天地大为作为”随处大写，倒想看看知青在哪，在做啥，一无踪影。我又想偏了：太广阔了，行车昼夜还在赣境，满目丘壑田野，无边无涯，知青像小舟，驶向汪洋浑不见；别说有否作为，风浪中求存能否？心中忽生隐忧。——多操心了，举国体制，角角落落都由各级革委会管，侪设知青办在落实运动，掿知青当远方来客，无论专列开到哪。
大皮交伊拉乐观得多，又寻着话头，开始争吵，云南吃细粮还是粗粮；我额种种烦恼，伊拉倒弗操心额。胖女生肯定来兮：“粳米是细粮，洋籼米是粗粮；精白粉是细粮，普通粉是粗粮！”马上有人反驳：“咯高粱算啥呢？”大家毋么吃过高粱，不过，“九·一八”伊只歌里，唱到大豆高粱。
“粗粮就是糠饼，忆苦饭吃过额！”沓句算振振有辞。“咯棒子面啥物事啦？”“憨唻，棒子就是珍珠米呀……。”我对生物感兴趣，晓得额比伊拉多，但讲闲话声音小，弗敢跟伊拉去争。我对粗粮一点弗担心，玉米、高粱，侪可以磨粉，加点糖精，做饼做糕，就甜点心唻。糖精是带了三小瓶，一百粒装额；估算过，一斤杂粮粉，半粒糖精就够。——无论专列朝哪开，吃粗粮还是细粮，是躲不开的现实，南北东西大有区别的，再教办也管不了，由天管、地管。
老布回来了，伢伢交告诉古巴伊拉，是吃香烟额事体。又得意来兮拍拍裤兜：烟斗囥（藏）下来了！兵子弟们会心一笑：机智勇敢。古巴最佩服老布额，就是伊有种理论：解放军比工人阶级高一档，讲起来有点绕。看实际，哎，奈真额摆平工宣队喏。哼，就像老布强调额，护送知青，应当派军宣队。
老布搬定是拆开纸烟，掿烟丝塞烟斗。伊毋么跟工宣队犟：“马、恩、列、斯，侪吃烟斗哎！”早晓得工宣队马列水平夜壶（差欠），讲弗清爽，香烟交出去算数。——我并不异议老布额异议工宣队，因为工人造反派占了我家房子。但转头一想，毋没工人阶级领导，专列覅乱啊，要斗狗崽子唻。
我是有兴趣去听伊拉讲的，但等到我跟朋友讲起啥，兵子弟是覅听额。——车厢两头日夜关闭，忒气味了，列车员开开门通通气，车厢接头处，空隙里会有风灌进来呀。不料有个老实相额，居然趁机“偷渡”过来：是“书读头”额朋友，绰号老尼。伊长得方面孔端正，弗大响，叫伊“泥菩萨”，省作老尼。大家追问“隔壁哪能嗄？”伊讲一样额，嘎三胡；昨日倒起劲过一趟，有个象棋手可以盲对两付棋，还各让一只车。着弗过伊，再让一只马，还是输脱，只好收摊。
老尼带过来一本新书，我凑过去：“鲁迅选集呀，插图蛮好，魏景山、陈逸飞额。哎，上海油雕室画毛主席像额噢，全上海浇毛主席石膏像，橡皮模子原型，是伊拉审定额噢。”
老尼听得对胃口，朝我一笑。伊学画画，讲：“毛主席定性文化部是帝王将相部、才子佳人部，以前画人物额侪批斗唻！”我回两句：“上海有两个大概能过关，画孙悟空额万籁鸣，画三毛额张乐平。”“叶浅予也画金猴，但犯额错忒大，还是逃弗过斗！”
老尼一听对头，开心起来，阿拉仨就立一堆讲闲话。邻坐同学乘机横睏座位上打呼噜。正好沓辰光开中饭，睏兄额份头就拨老尼吃，否则伊回过去吃饭，就难得再过来了。吃碗盖浇饭两角洋钿，睏旅店床铺九角，肯定是哎个横睏兄格算。
老尼晓得更加多：“万籁鸣画玉皇大帝，下巴生颗痣，讲伊影射毛主席，差点赶到乡下去。张乐平呢，沓个人叫额骨头高（运气好），老底子是画幽默，主角老少俩。碰巧去画个流浪小狙，跟上了穷人革命额潮流，从此转运。”伊有点口无庶拦，人老实；晓得弗，张乐平儿子就勒隔壁车厢。
魏景山跟陈逸飞呢，侪滑脚唻，去纽约唻，总算留点海派额种。——沓个是后来额事体，当年伊拉也算知青，有名头额知青。顺带便讲讲。
老尼讲闲话客气，有家教，爷是美术老师，“旧知”。阿拉讲艺术界，兴致勃勃，但几乎毋么人旁听。曲高和寡，所以除脱至交，老尼原来就一向闭嘴无语。至于到乡下后，伊写生风景，人物，牛马，农民看看蛮稀奇，但不知所以然的，说马身上应该长毛，猪身上没得这种干净……。老尼弗响，后来是一生做泥菩萨，少有人懂伊。乡下人理解“泥菩萨”，“老尼”倒又照叫不误；弗像我，因为贪吃，长肉，老乡谬夸我名字，起得好：“见粗”。
独头语文好，闲话也弗多；伊爷娘算“小业主”，以前顶下一爿街面房开胭脂店（杂货铺），后面隔一小间睏人。公私合营辰光店面属生产资料交脱，“生活资料”只剩一小间。“讲起来大房东更加吃亏呀，我爷蚀脱几年租金，大房东连产权一道出送唻。”伊是偷偷交讲过拨我听哎点（那些）。讲只好合营呀，已经统购统销了，私营进弗着货。——我爷思想改造得好，从来弗跟小人讲沓种。后来再晓得，房产商也逼得侬合营额：房租只准收几角洋钿，修房子又侪要侬负责，明摆要赔钞票；请个老账房管事体呢，还要另外贴出去工钿……。
独头一直跟我投机，别人面前弗讲哎些额。伊拉俩灰色成份，我黑色。不过一旦做了知青，红黑同学关系起微妙变化：下了乡就难兄难弟了，晓得要同舟共济。我伲已有感受，放心一堆说笑。不过我也忒轻飘点，车厢里有好几个斗过我爷，来抄过家，随时好兜我老底额。我弗认得伊拉，伊拉记得我。结果哪能？后头再讲。
（200-14·待续）
最新评论