10．雁过
大皮交跟另外个眨眨眼，俩人轧出去。做啥？一道进厕所了。呯一声碰上门，怪弗，野路子！老爷叔促刻，叫伊拉额野鸡学堂。四旧叫法，红卫兵要刮三（打）伊，幸亏伊是劳动阶级。其实老爷叔蛮有眼火，沓帮人弗正宗。
我看过去，寻哎面（那边）有小学同学弗。果然，“阴沟”，老早额老交（老友）呀，有点鹰勾鼻，再加伊贫血，嘴唇皮白，一眼认出来。伊究竟叫阴沟还是鹰勾，蛮难考证；假使叫鹰勾，伊人品应当有点凶，伊倒是忒老实额。后头会写到伊，等侬详细了解了，再决定伊实际是叫啥。伊功课是差额，归到了野鸡学堂。
伊可以照顾额呀，瘦刮刮，气喘，哪能也下乡？独子、寡母，爷是啥人，弗晓得；反正是“夹种（混血）”；面皮白，鼻梁高，头发灰。涉嫌里通外国？倒毋没，母子住棚户，穷到杀根；城市贫民，成份过硬额。哦，听讲过伊娘想再嫁，人家嫌贬“拖油瓶”；长得好弗算啥，上海人讲实惠。猜噢，寒酸相额儿子出送了，娘……。
弗管大皮交、阴沟了，哎面有俩女生佬漂亮，对呀，十步之内必有芳草：穿大翻领运动衫哎额一对。大皮交吹牛得意辰光，就要朝伊拉瞄一眼，无奈人家不耐俗，根本弗睬伊。弹眼碌睛（夺目）额人，当然有人说长道短，就晓得底细了：上海的样板戏剧组每人发件军大衣，推广样板戏额小分队，一人一件大翻领，跟乒乓国队出访穿得一式一样。内部供给，所以稀奇呀。晓得了来历，列宁装几个，倒弗再想检举伊拉了；看表现吧！党的女儿的女儿，自觉地，监视旁的女儿。
横七竖八那一堆，就伊拉俩个坐得笔挺。明眸晧齿，窃窃笑语，侬覅猜嫉，毋没评头论足啥人，是向窗外指点江山。看一对丽人看风景，更加一道美景。车窗外掠过一双燕，又掉头飞回来望一眼；燕是春的使君，能鉴赏天姿。一对燕子应当是停到车顶上去了伐，一道去云南唻。
就沓俩个哦，出事体唻，逃脱，逃回上海去唻！哪能介桩事体？当天后半夜，突然听见大喇叭放《北京的金山上》，大家吵醒；一看，火车停只小站，灯火通明。车厢里喇叭通知：大家开窗换气，再带好毛巾牙刷下车……。
原来特意安排额，火车开到迭搭，鼾声交响额车厢，臭出来了，人也弗清爽了，乘列车加水，大家清洁一趟。好了，弄过，叫扁一吹：“上车……”。火车一面开，工宣队一面巡查，咦？哪能少脱两个，问来问去，侪讲毋没看见！啊，逃脱啦，工宣队面色铁青。——结果是场虚惊，后头有交代。
就伊拉事体多，曾经还蛮出过风头；出类拔萃额人物，将来一定出人头地？谁料又应了“红颜薄命”：弗是被占有又被抛弃的老套，阿玫阿菊却因少年欢爱触犯禁忌，又为坚守一份情义，决意放弃前程，甘历一世困苦。阿菊，甚至少年早夭。“风流总被雨打风吹去”，沓只摘了苦果额悲剧，知青史上可以“照汗青”，雁过留声。
同样出格，是别一种犯禁，更加高标道义，大昌几个呀，护民抗粮，这也后面再讲。车上，伊拉正淡淡闲聊，旁听额倒蛮多，男生侪好汉情结。所及是惊动海上额几桩武斗，事件原委，结果究竟哪边输赢，别版传说交关，内里乾坤也为外人不晓。哪个好汉中了美人计，脱力不敌对手，江湖上当然一致取笑。有人问唻，哎，哪能嘎额美人计？王顾左右而言他，只说是躲在某处弄的，铺盖是体委宿舍偷出来的；值几钿、几张工业券，侪拨女方了……。讲的轻描淡写，听的惊心动魄、想入非非，哈，处男！
“咯么变垃三木克唻（妓女嫖客）？”问额人弗懂经，似是而非。有一个问得好：“讲武术队有个轻功好，飞檐走壁，进到闺房去了，真额弗？”奈闹猛了，议论女额是啥成份呢，男额应该哪能判呢？……
转过头，再讲到啥人额教练是啥人，区队还是市队，武术队还是刹跤队还是拳击队，侪确实有据。讲到得意忘形，比划几记武装带八式、板凳十二式，新创套路，拆穿讲，是鞭法、三节棍化来额。
哥们，相识恨晚。侠聚笑谈，大碗酒，大块肉？看伊拉，大口缸盛白开水，摊一把香瓜子而已。闲话里又透露心中寥落：路见不平，仗义出拳，先前打牛鬼蛇神算对路，随后造反派打相打，争做司令，帮啥人好！“侬猜我爷叔哪能讲？伊讲坍招势（丢面子），配模子像走江湖卖身坯，拨人家看弗起！”
闯天下去，自家去立个名头。太极拳祖师张三丰听讲弗？还有人讲形意拳是伊开创哎。张三丰用武功摄服南蛮，流芳百世，现在形意拳冠军，是勒云南呀！我晓得额，大昌选云南插队，别有动机。哎，边寨辰旧张三丰当年的草莽？难以凭空想象呀。——后来伊拉真额闯进少数民族山寨，成就了一番特别意味的“江湖功名”，可惜最终跟政策弄反脱了。
一点浩然气，千里快哉风，凭额是一腔“义气”。为公道舍私利就称“义”，老话讲“道义”，道有多宽，义有多高。如文天祥，高义丹心，凭学问，知天道所在。江湖侠士担当，多在山头公益；碰上了，应着大道、天下趋势，也或垂名。我想帮伊扬扬名，后面会写伊拉，覅埋没了。
火车风雨兼程，行进节奏，单调又确切，带乘客去额前程，似乎也宿命而不可违。当年我勒车厢四顾，就觉得两个漂亮女生，还有沓个英气少侠，弗同凡响；哪能料得到，偏偏就伊拉，是悲剧收场；反倒是遭人贬额阴沟，后来有稳当日脚。……人啊，逃弗过命，就所谓命运呀，自家无法掌控。
大昌伊拉吹脱一歇，相互使眼色，一道起身，也居然一道进了厕所，砰一记碰上门。“吃香烟去了”，有人猜出来。大家散开，厾下来一句：“沓两只模子，胸肌起码三指！”
汽笛声异样，转头看窗外，原来又掠过了大站，“弗停站噢”，哗哗然。大昌讲：“哦，是怕知青溜脱，奈要死，昆明大概弗停唻。形意拳冠军沙国政，散打九段何福生，侪勒昆明哎，想去拜访额；又分别是武当、少林底子哎，鼎忒唻！奈可惜，昆明可能停东站。”
“专列不编班次，何必停客站，大惊小怪”，古巴讲笑：“还像大串连啊，一靠站台大家爬窗口，寻开心；覅想唻，奈要等开到头，昆明东站统统下车，即刻调乘汽车，休想进市区；货运站上车，货运站落。”沓几只军装模子，扎台型，又有点煞风景：伊拉沓只角，冒出来股大葱气味，上海人是忌额；古巴沓趟发议论，又叫大家失望。
（200-10·待续）
最新评论