3．木胡梯、投胎
两个堂阿姐送我上车，学过俄文额老三届大学生。元旦前头人民日报发表上山下乡最新指示，相提并论大、中学生，不过伊拉（她们）刚派到基层实习，毋没动员下乡，怪胎！
俩人穿额工装，遮弗脱娇气，坍我台；潮流女性要黑面孔红腮、粗眉大眼、亢奋激动。嗲样子是反动额。车厢莫佬佬人，拨人家轧，盯勒看，有几记轧，明显是吃豆腐。伊拉窘迫，像小猫勒陌生人脚馒头上（膝上），忐忑不安。
寻闲话讲：“上车辰光嚇煞人唻！”我暗自笑伊拉无能。车厢门口摆额是木板钉额临时台阶，人轧，伊拉怕一脚踏空。“拏（你们，读拿）到站台上去还好点，等脱一歇又轧煞人。”就轧下去了。站台破落相，绿皮车厢又斑斑驳驳，送客也大都旧衣裳打补丁，一切符合艰苦奋斗伟大思想；钞票省下来造原子弹唻，大家感觉自豪。就伊拉俩个，特为穿了新工装，弗大入调。
我从窗口摆摆手再会，也摆摆手，弗走。啥心情？暗自庆幸，还是怕运动扩散，终将难免？去做乡下人，咯要死唻；看到花盆里钻出来条蚯蚓，也大惊小怪；晒一歇太阳，又要照几遍镜子；伊拉两个下乡，搬定（肯定）发神经额。不如嫁人，要紧弗煞谈朋友。曾经额校院男友，心思佬早转唻，先揪斗教授，再内哄“大辩论”；辩弗清，磨刀擦枪，管侬儿女情长。情意绵绵《夜上海》，反革命歌曲噢。
看看北京喏，红卫兵大检阅，宋彬彬奉旨改名宋要武，登上《人民日报》头版。“叫什么名字？”“文质彬彬的彬？要武么！”天翻地覆唻，象伊拉沓种资产阶级子女，嗲妹妹，弗作兴啰。
留上海实在也殟塞（难受），拨人家点点戳戳：吃老米饭（剩女）。总归要婚配伐，三姑四姨总欢喜做媒：大几岁，房间几平，工资几钿……。假使爷娘侪死脱，顶好，毋么负担。将就将就，小学毕业无所谓额，总比去嫁农民好。浪漫爱情？做梦去，要么革命浪漫主义，献身贫农光棍呀。
伊拉就沓能处理脱了。时兴抢购处理品，捡货；千金们也都卖，钢琴也卖，做家子婆唻，要换洋机（缝纫机）。还算趁早噢，隔年，旧货店弗收钢琴了，堆满唻。随着革命形势大好，终于有拖拉机进城，装了钢琴去劈柴。随后又钢琴伴唱《红灯记》唻，劈柴额慌只把；有大小姐下嫁郊区，大床上劈了腿的，倒早已定局：谢绝远行。唉，早生廿年，没准还轮个“名媛”啥，至于嘎落魄？
我娘是外公额幺囡，表哥们，大都读大学了。前头几年亲友碰头，总归是“学好数理化，走遍天下都不怕”；老话头，有点俗，司马迁，李白，弗比数理化重要啊。文革启动，伊拉先去大串连，看看聂元梓们的大字报，哦，到底天子脚下，得风气之先，侬毋没背景，用弗什去争啦。沓种见识，就忒一般。
专才稀缺，后来上海安排伊拉下农场一趟镀金，再放到车间认个师傅，从鎯头锉刀学起；学业无所施展，但已属干部编制，工作证上一个“干”字。顶要紧记得喊点口号噢，接受工人阶级再教育，否则，又叫臭老九唻！
——“潜龙勿用”，上海话“盘起来”。弗露声色中吃准了各行业门道。等后来改革开放唻，虽然踏黄鱼车起步，伊拉也接棒出力。周末还去乡下社办工厂上班，“礼拜日工程师”，名噪一时。过年获奖一只老母鸡，“啊，正宗浦东九斤黄哎，老九吃香唻！”新婚妻子打碰（玩笑）；又讨个好：“我同学额娘舅喏，付处级，春节特供，不过一只小来兮额冷气鸡。”
邓小平就觉得上海稳健，有内劲，宝钢拨上海弄。弗象暴发额新城，光怪乱局，道是文化沙漠。回头一想，数理化走遍天下，有点道理额，还有考托福出去留学唻。流行饭夹子录音机，听英语九百句；更新上海人脑子额，就是沓种日本淘汰货。快四十岁额老伙子，胡子刮光，做留学生去，男同胞的专利哎，女生已经抱小人了。亲友圈里，沓种例子佬多额。
——就此而论，当得谭嗣同一句“去留两昆仑”；中学生去得爽气，大学生留也有功。似乎蛮得意，侪叫得响。不过到了下半场，再看清爽，去客实在都做了留人的垫脚石。车厢门口的“毛拉拉（粗糙）”木板台阶，上海叫胡梯；沓只临时措施定格了一代知青的人生：中学生踏上去远走高飞，大学生踏上踏下原地生根；假使有人踏空，就另辟蹊径了：赖下来做“社会青年”，去防空工程当义务工。
大龄社青，待业多年，又叫待青，终于拨出路唻：怪弗，扫马路额吭碰啷（都）戴了大口罩，看样子还蛮年轻，哦，待青做“环卫”。怪弗得，小菜场鱼摊头肉摊头也有大口罩：上海人额人下人，弗好意思。
算顶幸运唻，分到公交车上卖车票。高峰车轧得五海，座位侪拆光，绰号大蓬车，正好印度电影《大蓬车》风行呀。碰到上下班，轧头势实际上是像印度穷人轧火车；卖票员看工人阶级轧足，闷声弗响，只当伊拉侪有月票。终于发现个黑皮阿乡：“哎，穿破衣裳沓个，投五投六，想逃票啊！”未料是个知青：“赤那，侬讲啥人啊！”正宗沪骂。
要打唻，亏得老师傅来淘浆糊：沓点是侬弗好，艾点是伊弗好，……我儿子阿插队呀！还毋么吵出结果，“啊呀，我到站唻”，小青工掿伊推下去：“买啥票啦，共产主义实现唻。”青工侪有兄姐下乡额呀，沓一幕蛮感人，插兄落魄，真有人同情。小青工跟插队兄姐反目成仇，是到后来额知青返城，怕伊拉来抢房子：七荤八素谈朋友，房子是张王牌哎，硬碰硬额，哪能好让呢，毕竟“爱情价更高”！插友们真正落魄了，举目无亲。
社青自诩高下乡一等：户口勒上海。果然，过脱十几年，出去的返城，揣着“袋袋户口”，一弗准办执照开店，两弗准啥，三十老几唻，要寻饭吃，只好拨（给）本地户口小老板打杂，做人下人额下人。原来在红旗下共同成长哎，奈要看老板面色唻；木胡梯的恶作剧？靠弗牢额临时措施！
毋没平等机会，政策像川剧“变脸”，戏弄人生。上海人绝顶聪明：“看侬投胎呀！”弗怪政策，怪命弗好，当局为之大感宽慰。啥人额命途最虚幻飘渺？曾远辞故城的知青，啥都还没着落哎，……。弗是破过四旧了么，还迷信命运？对额呀，走额辰光是相信伊呀！
（200-3·待续）
最新评论