上海以前有个行当，街头巷尾弄堂口侪见得到，现在是少得来寻也寻勿着，就是大大小小的裁缝店。小辰光识得两个字之后，以为迭些裁缝店统统是一个叫“苏广”的人开了咯，因为招牌上头总归有“……苏广成衣店”几个字。大了再晓得招牌浪迭能写，是表明店里做的针线生活像苏州裁缝实梗细巧，做出的衣裳比得上广州师傅一样新潮。事出苏州出名的有苏绣，针线板定灵光;而广州历史上受西方影响比上海早，服饰自然欧化时髦，故所以加了“苏广”两个字来做店招打广告。
南昌路钱家塘口口头也有实梗一爿小小的苏广成衣店。裁缝店小开小辰光同阿拉一样，老清百早弄堂里捏把破蒲扇呼啦呼啦生煤球炉。生煤球炉是门技术活，讲起来起码六十岁以上的上海人才会生煤球炉，当年煤球炉叫做洋风炉，勿知是从西洋还是东洋（日本）传过来的舶来品。煤球炉烧的一只只鸭蛋大小的煤球，是煤球店里用浸水煤屑机器里轧出来，早期机器是人力手工摇的，摇煤球是出力气满身煤屑的辛苦龌龊生活（工作）。到了20世纪60年代，煤球炉进化为煤饼炉，煤球店里有现成的煤饼卖，但是交关人家是买煤屑回来，顺带便店里免费借只简易工具，煤屑摊了弄堂里地浪和了水，用迭只工具敲出一只只煤饼来，比店里便宜，各家小囡侪会做。DIY上海人蛮早就流行了，勿好算改革开放以后传进来的时髦。再过了20世纪70年代，煤气、罐装煤气普及，街边的煤球店也就慢慢淘汰了。
生煤球炉辰光，炉膛里先团半张申报纸，上海闲话里任何家报纸侪叫申报纸，因为《申报》是上海滩第一家家喻户晓的报纸。报纸上头加几片碎木头，然后铺个五六只煤球上去，一根自来火点着报纸小心拿把破蒲扇煽，逐渐加大力度煽到几只煤球烧炀（yáng）再好加足煤球上去，又再煽到窜出火苗，迭只煤球炉算是生着了。看看容易做做难，因为几乎每天早上要生煤球炉，报纸要节省只用半张，碎木头也是少少几根，碰着煤球又呒没干透，搿是再哪能用力煽也是烟雾腾腾，弄堂里有几只煤球炉子勒拉日照煤炉生紫烟一片仙境，伴杂不和谐的童音咳嗽声，上海的早晨迭一幕，就正式拉开了。
早浪小囡生煤球炉压力颇大，因为有极强的时限性，一家人就等牢迭只煤球炉子火炀上来派用场：第一是烧点热水揩把面，清洁卫生蛮重要;第二是烧一钢钟镬子（铝锅）泡饭，一家人家全体成员匆匆忙忙吃了上班的上班，上学的上学，辰光一眼也推扳勿起;第三就是烧开水泡茶吃，交关上海人早浪头起来勿喝口新泡的热茶一日天呒没精神，赛过像外国人早浪总归要吃杯现烧的咖啡一样的道理。
万一，报纸引火柴烧光了煤球还呒没点着，搿就要从头来过，顶着急大人已经勒拉催问，等牢迭只煤球炉子派用场！急办法就是问要好的小朋友钳（沪音：坚）两只旺煤球到自家煤球炉里做火种，迭辰光最能看出“薪传”的重要性了。问题是小朋友的姆妈也已经催伊用力煽火头快点上来，旺煤球钳畀侬了就要影响自家只炉子的火候，心有余而力不足啊！只好老老面皮问裁缝店小开讨两只旺煤球，伊屋里开裁缝店有两个师傅加学生意（徒工），人口多煤球炉子尺寸也大（外加煤球炉子上头还常年坐两只烙铁熨斗），因之伊生煤球炉用的申报纸是一叠一叠问收旧货手里称斤头买转来，柴爿是成捆的正规引火柴，生煤炉勿顺手的辰光还会得店里拖只电风扇出来朝炉膛里吹风，迭个度量级勿是一般屋里的煤球炉子好比，因此从伊个炉子里钳两只炀煤球总归肯的（上海闲话讲“钳两只”是口头俗语，实际是三五六只的统称）。所以弄堂里的小囡侪讲裁缝小开人乐开，搭伊蛮要好，一道长大了人缘就好，迭个交关要紧，后头会得讲到。
钱家塘里的大人也講裁缝小开好小囡，因为常桩见到伊放学功课做好会得坐了店里案板边啷捏根针帮了缲（qiāo）边锁纽扣，交关巴结（勤劳）。大了裁缝小开读书好进了大夏大学，还是看见伊着套自家店里做的西装，套根领带戴副圆眼镜勒拉踏部“胜家”老爷缝纫机帮了做生活，街坊邻居也就与时俱进改脱末脚两个字叫伊一声“裁缝博士”。迭个画面勒拉我的脑海里交关深刻，因为老爷叔刘琼勒香港辰光拍过部片子叫《方帽子》，就演过同样一个裁缝小开角色，女主角是王丹凤老师，可惜我看的辰光人还小，今朝底连得片子内容也记勿得了，要请沪港两地的克勒们来补证了。
有天黄昏头，裁缝店店门口来了个中年人，还带了两个人帮腔，立勒马路边浪对准之裁缝店哗哩哗啦骂太平山门。只听见伊嘴巴里勿清勿爽勒骂啥个“做梦！癞蛤蟆想吃天鹅肉，也勿撒泡尿自家照照看……”裁缝博士只当勿听见，低牢之头仍旧哒哒哒哒踏伊的缝纫机。看到迭副吞头势嘛，迭个人气更加上来了，骂得加二起劲，“小赤佬勿畀点颜色侬看看骨头贱了啊是？搿能一爿裁缝店针线捏捏糨糊刮刮会得有啥出头日脚？阿拉‘水明昌的大小姐会得看相侬？捏鼻头做梦！关照侬识相点，勿识相请侬吃辣火酱……”伊越骂越光火，声音也越来越大。迭辰光只见一位街坊立出来对“水明昌”来的几个人讲：“敝人是此地的邻居，听了几位半日天讲的有点感想，体会勿大深刻，讲得勿对嘛欢迎批评指教，让我参考提高，大家交换交换意见共同进步。
“中央政务院（刚进20世纪50年代，后来再称国务院）刚刚颁布了《婚姻法》，搿个是伟大的共产党英明领导下，推翻三座大山妇女姊妹大解放，保障婚姻自主禁止封建包办。所以嘛，有些闲话啥个‘癞蛤蟆想吃天鹅肉讲出来就跟勿上形势了。
“还有，今朝解放了，大家民主平等，再讲啥个‘门当户对也落后了。开裁缝店是自食其力劳动光荣，侬‘水明昌再大也是资产阶级，勿好再高高在上看勿起人，要小心犯自高自大的错误啊。
“迭位同志我批评得勿对可以向侬检讨，侬刚刚讲的‘畀侬点颜色看看，迭句闲话是新中国成立前头旧社会流氓白相人的切口，现在大家侪要向过去告别，迭种落后的闲话就勿好再摆了嘴巴边浪，希望抓紧提高觉悟跟上形势，大家一道进步……”
边浪的人听伊讲闲话里厢用了介许多新名词一大堆，赛过勒单位里听领导做大报告，就个个连声讲：“对呀，对呀，有道理！”还差点拍手鼓掌。
迭辰光只听得“嘀铃铃”一阵自行车铃声响起，一位绿衣邮递员推了车子穿过围观人群，大声讲：“来来来，让开点！吵相骂有啥看头，还勿快点回屋里去看《新民晚报》。”伊的邮袋里就是塞了交关《新民晚报》勒嗨。
乃末闹猛了，边浪一帮小囡就跟了哄起来：
“新民夜报，夜饭吃饱，大家睏觉。哈哈哈哈。”
“小弟弟小妹妹跑开点，敲碎玻璃老价钿，问倷姆妈讨两钿，屁股敲得痛来西……”
马上又有人跟上来：“唉呼唉——卖烂东西！啊有坏的灯泡调自来火伐。”
“棕绷籘绷修伐？坏脱的木器家什修伐？”
“生铁补镬——”
“修阳伞，坏套鞋修伐？”
一批小囡越喊越起劲，明摆了嗨是存心嘲嘲侬“水明昌”来的几个人，倷口口声声看勿起裁缝博士就是欺负阿拉钱家塘的人，大人带头立出来搭侬评理嘛，阿拉小囡大道理讲勿来，捣蛋总归会，葛末比赛啥人来三：
“大饼油条，老虎脚爪——脆麻花。”
“香炒热白果，香是香来糯是糯，一粒开花两粒大。”
“桂花赤豆汤，白糖——莲心粥。”
“五香茶叶蛋，火腿粽子。”
“檀香橄榄卖橄榄。”
“卖晾衣裳杆，晾衣裳竹竿买伐？”
“栀子花——白兰花……”
“削刀磨剪刀！”
……
一时间好像全上海做弄堂生意的人全部集中到钱家塘里来了。“水明昌”几个人先是畀迭位街坊一顿大道理普法教育了一通，又畀批小赤佬一捣蛋起哄，气得来后头闲话讲也讲勿出，只好灰溜溜跑路。
后头才晓得领头的人是“水明昌”女小开的娘舅，不过是再也勿敢来寻吼势了。因为过了两日有队人敲锣打鼓来送喜报，裁缝店门口贴出来，大红纸头上面写了“一人参军，全家光荣”八个亮晶的浓墨大字。原来“裁缝博士”大学里响应号召参加了“南下工作团”，热血沸腾地投身解放全中国的伟大革命战斗中去了。再勿久，裁缝店店堂里迎面墙上一只镜框，上头的大照片是“裁缝博士”同“水明昌”女小开的并肩合影，两家头着军装戴军帽，一人胸口别块布头上头印了“中国人民解放军”几个字。镜框边浪还有两行字，一边是“战斗先锋”一边是“革命伴侣”。弄堂里的人侪来看稀奇，新娘子勿着婚纱拍结婚照，还是一男一女两个小开，思想实头进步啊。
上海闲话里“骂山门”是骂人，“吵相骂”是吵架。上海人一向文明，遵循老祖宗的“指桑骂槐”法则，迭种冷战行为上海人谓之“骂太平山门”。随便骂得哪能难听就是勿能指名道姓，真比联合国開会还文明。侬骂侬的又呒没手指头点到我鼻头浪，尽可以当侬撒屁勿听见。熬勿牢回一句：“侬骂啥人？”对方讲：“我骂赤佬。”再回一句：“赤佬骂人。”大家搿能“山门”骂来骂去，只要勿触及实名制底线，总归太太平平，故所以叫做“骂太平山门”。今朝叫做“语言暴力”，当然勿文明，严重的还能触犯法律。
老底子“水明昌木器店”上海滩浪有名气，南京路“红庙”旁边就有老大一爿总店，四川路香港路也有家分店。“水明昌”老板木匠出身，最早跟牢外国家具商打工，学得蛮快会得出样子做西式家具。外国人身胚大住的房子也宽舒，西式家具对中国人来讲忒嫌浪呆勿过（过大而笨重）。迭个人会得动脑筋，伊拿西式家具缩减尺寸简化，快来兮就打开了局面。样子新式，实用舒适，价钿比红木家什便宜，做出牌子卖得交关好。伊又经常托跑外洋轮船的宁波同乡带国外的家具书籍杂志转来，剥了样子推出新款做到不断领先潮流。回顾历史，“水明昌”对发展上海工商业，参与铸就海派文化，是有贡献勿应该全盘否定。
讲转来过去做裁缝勿板定要坐店，有了搿门技艺也可以自由自在专做上门生意，叫做“走做”。上海滩浪但凡经济条件好一点的人家，会得请上门师傅帮屋里老老小小做批时令衣裳，赛过裁缝店工场间开了自家屋里，有点人家只提供一顿中饭，走做师傅早浪来夜里去;大人家还会提供住宿，搭自家屋里佣人一样待遇。走做师傅一般熟人介绍，也有做过一两趟彼此相处得好，下趟有事体还是请伊做。有两个走做师傅名头响，赛过今朝金牌月嫂，换一换二辰光排好，还要赶赶场子再轧得进时刻表了。
过去兴子孙满堂人丁兴旺，一户大人家几房团堆了一道是事业有成的表现。除脱出客衣裳考究点大店去做，交关日常衣裳是自家买整匹头料作请个上门师傅来做，勿光精打细算还图个方便。大人家勿光大小主人数字多，底下佣人前前后后粗做细做加加拢来十廿个勿罢，侪要备齐一年四季的工作服，否则底下人各人着自家衣裳勿讲破旧嘛也是看上去像杂牌军，交关呒没卖相，畀外头人看起来迭家人家一副败兆相。尤其过年了，年卅夜大人小人人人一套新衣裳，佣人也勿论其外，看看两个贴身娘姨奶妈贴身丫头，真比普通人家女主人还要着得好。佣人衣裳也勿能马虎，还要讲讲排场势，工种勿一样要着勿同的式样，比如看大门的老山东学机关学堂传达室派头，要穿布的呢的中山装;汽车夫小浦东要洋派穿军便服;园丁花匠着工装裤，烧饭师傅老宁波白制服白围涎，茶房杂役白上装黑裤子……介许多各式衣裳要做，忙起来一个走做师傅带个帮手再加个学生意（学徒）还真兜转勿过来。
讲了“量”的方面再讲讲“质”，天冷要着皮袄，先是皮货贩子背了大包小包各式皮料上门看货色定价钿，一件一件皮统子备妥料，再由走做师傅一块一块皮料补缀起来吊成一件皮袄里子。因为皮料讲究轻薄软，张张面积大小适中，搿里厢价钿上落交关大，送出去做怕畀人家掉包以次充好，一做三五六件就损失大了，到底勒拉自家屋里摊开来看牢伊做就放心多了。再有翻丝绵做骆驼毛冬衣也一样，件数做得多了，裁缝师傅夹点丝绵头旧的骆驼毛进去变了黑心绵看也看勿出，啥人晓得是勿是死人身浪剥下来的衣裳拆出来的旧丝绵旧骆驼毛？几化腻心！
除脱做衣裳“保质保量”，还有“花色品种”，可以讲但凡针线生活侪要捏得起，比如各种帐、幔、披、围、垫，窗帘台布罩子，说勿定还有摆满月酒辰光小毛头的抱裙披风……迭些极具个性化的物什拿出去定做加工交关烦难！走做师傅一样一样沿（沪音：燕）了尺寸做就一记头解决问题。不过逢到有搿种生活，走做师傅就要另外再带个叫做绣嬢的师傅过来，因为迭些物什侪要绣各种喜庆花头，一般点人还真绣勿来。
绣嬢一般江南女子卅来岁年纪，刺绣迭种一针一针精细生活粗手大脚是做勿来的，所以绣嬢总归是心灵手巧，秀外慧中。做迭个生活大人家屋里进进出出多了，行为举止礼仪方面也有了修养，真好做江南女子的形象大使啊！
有趟一份大人家请了走做师傅同一个绣嬢来，绣嬢身边还带了个三四岁的囡圄，小姑娘白白嫩嫩长得？（沪语觑音，漂亮、好看、可爱）是？得来人人看见喜欢，嘴巴又甜得来像只小八哥，众人侪宝贝伊。恰好迭份人家位二太太进门来呒没生养，交关喜欢小囡，阿拉侪叫伊二嬷嬷是日夜放勿脱小绣嬢哉，带了身边赛过自家的亲身囡圄一样亲得勿得了。葛末就有熟人讲了：“呒瓜就揾个茄结下啦。”（粤语：长不出瓜来就找个茄子结一下吧）二嬷嬷同老爷商量过之后就对绣嬢提出要正式收养小绣嬢做囡圄。其实做娘的是老早看了眼里想了心里：迭个囡，好点，寻份人家嫁嫁脱;差点，畀人家做个童养媳妇也是出路，自家年纪轻还想生还一个儿子得来。所以闲话勿多，一句就满口答应了。二嬷嬷讲：“侬个囡圄勿是卖畀我，阿拉迭份人家开通来西，屋里买来个丫头老早就户口簿上头改了养女，侬放心勿会亏待伊。当然小姑娘要改姓改名字，将来有名分好分一份家产。大点我会得送伊去读书识字，再大点寻个门当户对的风风光光嫁出去……侬总归是伊个亲生娘，平常也可以来走动走动看看侬个小人，老爷是新派人物，伊亲口讲过的，侬尽管上门来好了。”绣嬢听了欢喜得眼泪也落下来，只会连声说：“谢谢、谢谢……”开开心心回乡下去准备再生个儿子称称心心过日脚。
一眨眼睛十几年过去了，小绣嬢都读大学了，想勿到迭份人家亲友团当中有个男小囡叫宝比，较之小绣嬢大个三五岁，青梅竹马一道长大，有趟搭自家娘一道从香港回来，正式提亲要讨小绣嬢做“新抱（粤语：媳妇）”。可是小绣嬢一口回绝，因为伊立定志愿要做一名地质勘探队员，用双脚去丈量祖国大地，寻找地下宝藏为“五年计划”奉献青春。香港只有一座狮子山，走个半日天也就踏遍青山人未老。宝比爱煞小绣嬢穷追不舍，还特为跑到乡下去寻着小绣嬢的亲生娘通路子献殷勤，讲伊个阿弟讨娘子的事体包了自家身浪……事体弄得交关闹猛，真像现在的蹩脚电视剧一样烦法子。
后收来小绣嬢嫁到香港去了，伊心气邪气高，哪能好坐勒屋里做阔太太？介许多年来坚持勒一所左派办的愛国学校里做教书先生。伊个婆阿妈回上海辰光讲：“出粮（发薪）都呒够畀菲佣睇细佬哥（看小孩）的工钱啦……”迭所爱国学校里清寒子弟多，读书勤奋，品学兼优，毕业出来的学生逐渐成为香港社会的栋梁，小绣嬢勿好夸口讲“桃李满天下”迭句闲话，不过趟趟回祖国内地侪是作为“国庆观礼代表团”成员上北京，也算是一番风光了，当年立志做地质勘探队员的事体也就呒没几个人记得了。
以前有句老严肃的闲话常桩听得到，是讲“家庭出身勿好选择，走的道路自家选择”。今朝看看还是蛮有道理，勿好当馊脱的“鸡汤”倒脱。
最新评论